BAKI,VOA, Fərid Mikayılov
İran Birləşmiş Ərəb Əmirliklərində yerləşən nüvə obyektinə pilotsuz uçuş aparatı ilə hücumda iştirak etdiyi barədə ABŞ tərəfindən irəli sürülən iddiaları rədd edib.
VOA xəbər verir ki, İranın BMT-dəki daimi nümayəndəsi Əmir Seyid İrəvani BMT-nin baş katibi Antoni Quterreş və Təhlükəsizlik Şurasının sədri ünvanına göndərdiyi məktubda Vaşinqtonun ittihamlarını əsassız adlandırıb.
İran tərəfi bildirib ki, ölkə özü daha əvvəl ABŞ və İsrail tərəfindən dinc məqsədli nüvə obyektlərinə qarşı hücumların hədəfi olub. Məktubda nüvə obyektlərinə qarşı hər hansı hücum və ya təhdidin beynəlxalq hüququn ciddi şəkildə pozulması kimi qiymətləndirildiyi qeyd edilib.
Tehran həmçinin ABŞ və İsraili regionda sabitliyi pozan siyasətlər yürütməkdə ittiham edib və mövcud vəziyyətin əsas səbəblərindən biri kimi onların fəaliyyətlərini göstərib.
