BAKI,VOA,Yusif Şərifzadə
ABŞ və İran arasında aparılan danışıqlarda yeni mərhələyə keçildiyi bildirilir. Tehran mənbələri tərəflər arasında siyasi anlaşmanın formalaşdığını desələr də, yekun sazişin hələ hazır olmadığını vurğulayırlar.
VOA xəbər verir ki, İran rəsmisi Vaşinqton və Tehran arasında “siyasi anlaşma” əldə olunduğunu bildirib.
Mənbənin sözlərinə görə, əldə edilən nəticə tam hüquqi qüvvəyə malik yekun saziş deyil. Hazırkı mərhələ daha çox tərəflər arasında əsas prinsiplər və ümumi çərçivə üzrə razılaşma kimi qiymətləndirilir.
Bildirilib ki, danışıqlar zamanı bir sıra mühüm məsələlər üzrə yaxınlaşma əldə olunsa da, sənədin hüquqi detalları və yekun mexanizmləri üzərində iş davam edir.
Məlumat ABŞ Prezidenti Donald Trampın İranla bağlı son qərarı vermək üçün Ağ Evin Situasiya Otağında müşavirə keçirdiyini açıqlamasından sonra yayılıb.
Bu vəziyyət razılaşmanın hələ ABŞ rəhbərliyi tərəfindən rəsmi şəkildə təsdiqlənmədiyini və prosesin yekun mərhələyə çatmadığını göstərir.
Hazırkı mənzərəyə görə, tərəflər arasında ilkin siyasi razılaşma mövcuddur, lakin yekun saziş imzalanmayıb və son nəticə Vaşinqtonun siyasi qərarından asılı olaraq formalaşacaq.
Diplomatik dairələr hesab edirlər ki, Ağ Evdə keçirilən müzakirələrin nəticəsi yaxın günlərdə ABŞ–İran münasibətlərinin gələcək istiqamətini müəyyən edə bilər.
