BAKI,VOA,Yusif Şərifzadə

İran Prezidenti Məsud Pezeşkian ölkəsinin həm təhlükəsizlik sahəsində, həm də diplomatik müstəvidə fəaliyyətini davam etdirdiyini bildirib.

VOA xəbər verir ki, İran Prezidenti sosial şəbəkədə paylaşdığı açıqlamada ölkəsinin əsas prioritetinin milli təhlükəsizliyin qorunması və vətəndaşların sülh şəraitində yaşamasının təmin edilməsi olduğunu vurğulayıb.

Pezeşkian qeyd edib ki, İran öz milli maraqlarını və xalqın hüquqlarını qətiyyətlə müdafiə etmək niyyətindədir.

“Biz xalqın hüquqlarını qətiyyətlə müdafiə edəcəyik və heç bir təhdid qarşısında geri addım atmayacağıq”, – deyə İran Prezidenti bildirib.

Məsud Pezeşkianın sözlərinə görə, diplomatiya və müdafiə dövlətin milli gücünün əsas dayaqları hesab olunur.

“Diplomatiya və müdafiə milli gücün iki qanadıdır. Biz nə meydanı tərk etmişik, nə də danışıqlar masasından uzaqlaşmışıq”, – deyə o vurğulayıb.

İran Prezidenti əlavə edib ki, Tehran bir tərəfdən ölkənin təhlükəsizliyinin təmin olunması istiqamətində fəaliyyət göstərir, digər tərəfdən isə siyasi və diplomatik həll yollarının tapılması üçün səylərini davam etdirir.

Açıqlama regionda davam edən gərginlik və son günlər artan diplomatik təmaslar fonunda səsləndirilib.