BAKI,VOA,Yusif Şərifzadə

İran parlamentinin sədri Məhəmməd Baqir Qalibaf ABŞ-ın bölgədə atəşkəsə və diplomatik həllə maraq göstərmədiyini iddia edib.

VOA xəbər verir ki, İran rəsmisi çıxışında Tehranın milli maraqlarını və xalqın hüquqlarını qorumaq üçün qətiyyətli mövqe nümayiş etdirməsinin vacibliyini vurğulayıb.

“ABŞ nə atəşkəs axtarır, nə də dialoqa can atır. İran xalqının hüquqlarını müdafiə etmək üçün qətiyyətli cavab verməliyik”, – deyə Qalibaf bildirib.

Onun sözlərinə görə, İranın siyasəti emosional bəyanatlar və şüarlar üzərində deyil, milli güc, strateji düşüncə və rasional yanaşma əsasında qurulmalıdır.

Qalibaf qeyd edib ki, ölkə qarşısında duran çağırışlara cavab vermək üçün bütün sahələr üzrə koordinasiyalı fəaliyyət vacibdir.

O vurğulayıb ki, hərbi, diplomatik, ictimai və sosial istiqamətlər bir-biri ilə əlaqəli şəkildə fəaliyyət göstərməlidir.

İran parlamentinin sədri diplomatiyanın yalnız qapalı görüşlər və rəsmi danışıqlardan ibarət olmadığını da bildirib.

“Əgər diplomatiyanı yalnız qapalı otaqlarda aparılan danışıqlar və diplomatik təbəssümlər kimi qiymətləndirsək, elə başlanğıcdan uğursuzluğa məhkum olarıq”, – deyə o əlavə edib.

Qalibafın açıqlaması İran, İsrail və ABŞ arasında son günlər yenidən yüksələn gərginlik fonunda səsləndirilib.