BAKI,VOA, Fərid Mikayılov

Beynəlxalq Atom Enerjisi Agentliyinin (BAEA) baş direktoru Rafael Qrossi İranın nüvə proqramına nəzarət üçün “çox güclü yoxlama sistemi”nin yaradılmasının vacib olduğunu bildirib.

VOA xəbər verir ki, Qrossi cümə günü jurnalistlərə açıqlamasında BAEA-ya İranın nüvə obyektlərinə tam çıxış imkanının verilməli olduğunu qeyd edib.

Onun sözlərinə görə, ABŞ ilə İran arasında əldə olunan ilkin atəşkəs razılaşmasının əsas məqsədlərindən biri Tehranın nüvə silahı hazırlamasının qarşısını almaqdır.

ABŞ və Qərb ölkələri uzun illərdir İranın nüvə proqramının silah hazırlamaq potensialına yönələ biləcəyini iddia edir. Tehran isə bu ittihamları rədd edərək nüvə fəaliyyətinin yalnız dinc məqsədlər daşıdığını bildirir.

Rafael Qrossi qeyd edib ki, İran hakimiyyəti nüvə silahı hazırlamaq niyyətinin olmadığını bəyan etsə də, bunun təsdiqi üçün praktiki yoxlama mexanizmlərinin olması vacibdir.

“Əminliyə sahib olmaq üçün mümkün qədər tez çox güclü yoxlama sistemi tətbiq edilməlidir”, - deyə MAQATE rəhbəri bildirib.