BAKI,VOA, Fərid Mikayılov

İran Xarici İşlər Nazirliyinin sözçüsü İsmayıl Bəqai Avropa ölkələrinin ABŞ və İsrailin İrana qarşı hərbi əməliyyatlarında iştirak etdiyini iddia edərək onların məsuliyyət daşımalı olduğunu bildirib.

VOA xəbər verir ki, onun sözlərinə görə, NATO-nun Baş katibi Mark Ruttenin son açıqlamaları Avropa ölkələrinin ABŞ və İsrailin İrana qarşı həyata keçirdiyi hərbi əməliyyatlarda iştirakını təsdiqləyir.

"Mark Ruttenin Avropanın ABŞ-İsrailin İrana qarşı təcavüzkar müharibəsində qəsdən iştirak etdiyini etiraf edən təkrarlanan açıqlamaları bir daha göstərir ki, onlar bu qanunsuz hücum zamanı bitərəf olmayıblar. Ərazilərini, hərbi bazalarını və infrastrukturunu bu hücum üçün təqdim edənlər təxriksiz təcavüzə və onun ağır nəticələrinə görə məsuliyyətdən yayına bilməzlər", – deyə Bəqai bildirib.

İran XİN sözçüsü NATO rəhbərinin bəyanatlarını da sərt tənqid edərək, onları beynəlxalq hüquqa zidd hərbi əməliyyatların müdafiəsi kimi qiymətləndirib.