BAKI,VOA, Fərid Mikayılov
İran İslam İnqilabı Keşikçiləri Korpusu (SEPAH) "Nəsr-2" əməliyyatının 21-ci və 22-ci mərhələləri çərçivəsində İordaniya və Küveytdə yerləşən ABŞ hərbi hədəflərinə raket və pilotsuz uçuş aparatları ilə zərbələr endirdiyini iddia edib.
VOA xəbər verir ki, SEPAH-ın yaydığı bəyanata əsasən, İordaniyanın Əl-Əzraq bölgəsində ABŞ hərbçilərinin yerləşdiyi 20 anqar raket zərbələri ilə hədəfə alınıb. Bəyanatda hücum nəticəsində çox sayda ABŞ hərbçisinin öldüyü iddia olunsa da, bununla bağlı müstəqil təsdiq təqdim edilməyib.
SEPAH həmçinin İordaniyanın Əqəbə hava limanına raket zərbəsi endirildiyini, ABŞ ordusuna məxsus C-17 ağır hərbi-nəqliyyat təyyarələri və P-8 komanda-idarəetmə təyyarələrinin ciddi ziyan gördüyünü iddia edib.
Bəyanata görə, "Nəsr-2" əməliyyatının 22-ci mərhələsində isə Küveytdə yerləşən Əli Əl-Salem aviabazasına yüksək dəqiqlikli pilotsuz uçuş aparatları ilə hücum həyata keçirilib.
SEPAH ABŞ ordusuna məxsus erkən xəbərdarlıq radar sisteminin tamamilə məhv edildiyini, hərbi avadanlıq və ehtiyat hissələrinin saxlanıldığı anqarın, eləcə də MQ-9 tipli pilotsuz uçuş aparatlarının yerləşdiyi anqarın vurulduğunu iddia edib. Bildirilir ki, baş verən yanğın nəticəsində çox sayda MQ-9 pilotsuz uçuş aparatı yararsız vəziyyətə düşüb.
ABŞ və İordaniya rəsmiləri, eləcə də Küveyt hakimiyyəti İranın bu iddialarını hələlik təsdiqləməyib.
