BAKI,VOA, Fərid Mikayılov

İran ABŞ-nin ölkəyə müharibə və ya sülhün vaxtını diktə etməsinə imkan verməyəcəyini bəyan edib. Tehran eyni zamanda zərurət yarandıqda həm diplomatik, həm də müdafiə vasitələrindən istifadə edəcəyini vurğulayıb.

VOA xəbər verir ki, İran Xarici İşlər Nazirliyinin sözçüsü İsmayıl Bəqai Tehranda keçirdiyi həftəlik mətbuat konfransında bildirib ki, İran heç vaxt ABŞ-nin müharibə və sülhün vaxtını müəyyən etməsinə icazə verməyib və bundan sonra da verməyəcək.

Onun sözlərinə görə, İran yaranmış vəziyyətdən asılı olaraq həm müdafiə imkanlarından, həm də diplomatik vasitələrdən istifadə etməyə hazırdır.

Mətbuat konfransında ABŞ Prezidenti Donald Trampın Səudiyyə Ərəbistanı ilə imzalanan mülki nüvə sazişinin Ər-Riyadın İbrahim sazişlərinə qoşulmasından asılı olacağı barədə açıqlamasına da münasibət bildirilib.

Bəqai qeyd edib ki, Vaşinqton bu məsələ ilə bağlı mövqeyini qısa müddətdə dəyişərək yeni şərt irəli sürüb. O bildirib ki, bu yanaşma ABŞ administrasiyasının uzun illərdir nümayiş etdirdiyi siyasətin davamıdır.

İran XİN sözçüsü, həmçinin vurğulayıb ki, Nüvə Silahlarının Yayılmaması haqqında Müqaviləyə (NPT) üzv olan bütün dövlətlərin dinc məqsədli nüvə proqramı həyata keçirmək hüququ var və bu hüquq beynəlxalq sənədlərlə tanınır.