BAKI,VOA Orxan Qədirzadə
İraqın Baş naziri Əli əz-Zeydi ölkədə sənaye şəhərlərinin yaradılması, hava limanlarının tikintisi və dəmir yolu xətlərinin çəkilməsini nəzərdə tutan İnkişaf Yolu layihəsinə xüsusi diqqət yetirilməsini tapşırıb.
İraq Baş Nazirliyinin mətbuat xidmətinin məlumatına görə, Zeydi Milli İnvestisiya Şurasına baş çəkərək ölkənin müxtəlif vilayətlərində həyata keçirilən investisiya layihələri və onların icra mexanizmləri ilə tanış olub.
Baş nazir İraqın müxtəlif sahələrdə geniş investisiya imkanlarına malik olduğunu bildirib. O, bu imkanların real layihələrə çevrilməsi və iqtisadiyyatla cəmiyyətə daha çox fayda verməsi üçün proseslərin sürətləndirilməsinin vacibliyini vurğulayıb.
Zeydi İraqın xarici sərmayələrə açıq olduğunu və investorlarla uzunmüddətli tərəfdaşlıq qurmaq niyyətində olduğunu qeyd edib. Layihələrin daha tez başa çatdırılması üçün işlərin ayrı-ayrı mərhələlərə bölünməsi prinsipinin tətbiqini istəyib.
Baş nazir xüsusilə İnkişaf Yolu layihəsi boyunca sənaye şəhərlərinin yaradılmasına diqqət çəkib. Onun sözlərinə görə, dəmir yolları, hava limanları və sənaye zonalarının vahid layihə çərçivəsində inkişaf etdirilməsi inteqrasiya olunmuş iqtisadi mühit formalaşdıra bilər.
Zeydi kənd ərazilərinin inkişafı və kənd təsərrüfatının gücləndirilməsinin də vacib olduğunu bildirib. Bu məqsədlə kənd təsərrüfatı mühəndisləri və baytar həkimlərin investisiya yatırmasına imkan yaratmaq üçün kənd təsərrüfatı torpaqlarının investisiyaya açılması təklif edilib.
