BAKI, AzerVoice
Qazaxıstanın dövlət nüvə şirkəti “Kazatomprom” və Slovakiyanın aparıcı enerji şirkəti “Slovenské elektrárne a.s.” (SEAS) arasında təbii uran konsentratının tədarükünə dair Anlaşma Memorandumu imzalanıb.
AzerVoice xəbər verir ki, “Kazatomprom”un mətbuat xidmətinin yaydığı məlumata görə, 14 iyul 2025-ci il tarixində imzalanan sənəd iki şirkət arasında ilk rəsmi razılaşma olmaqla, strateji əməkdaşlığın başlanğıcını qoyur.
SEAS hal-hazırda Slovakiyanın iki əsas nüvə elektrik stansiyasını – Bohunice və Mochovce stansiyalarını idarə edir. Bu stansiyalar ölkənin elektrik enerjisi istehsalının 70 faizindən çoxunu təmin edir.
Yeni sazişin məqsədi Slovakiyanın enerji təhlükəsizliyini möhkəmləndirməklə yanaşı, Avropa bazarında Qazaxıstan uranının rolunu gücləndirməkdir.
Kazatomprom əlavə olaraq Bolqarıstanla da oxşar istiqamətdə əməkdaşlığa başlamağı planlaşdırır. Belə ki, bu ölkənin iki 1.2 MVt gücündə nüvə reaktoruna sahib stansiyası Qazaxıstan üçün Cənub-Şərqi Avropa bazarına çıxış imkanlarını genişləndirə bilər.
Yeni razılaşmalar Qazaxıstanın qlobal nüvə yanacağı bazarındakı mövqeyini daha da möhkəmləndirir və Avropa ölkələri ilə enerji sahəsində qarşılıqlı asılılığı artırır.
