BAKI,VOA,Yusif Şərifzadə
Küveyt və Pakistan hərbi və müdafiə sahəsində əməkdaşlığın genişləndirilməsini nəzərdə tutan birgə saziş imzalayıblar. Sənəd Küveytin müdafiə nazirinin Pakistana səfəri çərçivəsində rəsmiləşdirilib.
VOA xəbər verir ki, sazişin əsas məqsədi iki ölkənin silahlı qüvvələri arasında əməliyyat əlaqələndirilməsini gücləndirmək, hərbi təcrübə mübadiləsini genişləndirmək, hazırlıq səviyyəsini yüksəltmək və qarşılıqlı fəaliyyəti inkişaf etdirməkdir.
Tərəflər müdafiə sahəsində qurumlararası əlaqələrin daha da möhkəmləndirilməsinə sadiq olduqlarını bildiriblər. Eyni zamanda qarşılıqlı maraqlara əsaslanan hərbi əməkdaşlığın yeni istiqamətlər üzrə genişləndirilməsi nəzərdə tutulur.
Razılaşmanın iki ölkənin silahlı qüvvələri arasında təcrübə mübadiləsinə və əməliyyat imkanlarının təkmilləşdirilməsinə şərait yaradacağı bildirilir.
Pakistan son dövrdə bir sıra ölkələrlə müdafiə əlaqələrinin genişləndirilməsi istiqamətində addımlar atır. Məlumata görə, İslamabad bu ayın əvvəlində Səudiyyə Ərəbistanı və Türkiyə ilə də birgə müdafiə sazişi imzalayıb.
