Səudiyyə Ərəbistanının Dammam şəhərindəki Kral Fəhd Beynəlxalq Hava Limanında gömrük əməkdaşları ölkəyə daxil olan poçt bağlamasında gizlədilmiş 18 549 ədəd amfetamin həbi aşkarlayaraq müsadirə ediblər.
ArabAZ xəbər verir ki, Zəkat, Vergi və Gömrük İdarəsinin (ZATCA) sözçüsü Həmud əl-Hərbi bildirib ki, bağlama gömrük prosedurları çərçivəsində təhlükəsizlik texnologiyaları və xüsusi aşkarlama üsullarından istifadə edilməklə yoxlanılıb. Yoxlama zamanı həblərin bağlamanın içərisində gizlədildiyi müəyyən olunub.
Müsadirədən sonra ZATCA Səudiyyə Ərəbistanının Narkotiklərə Nəzarət Baş İdarəsi ilə əməkdaşlıq edərək göndərişi ölkə daxilində qəbul etməli olan şəxsləri müəyyənləşdirib. Əməliyyat nəticəsində 4 nəfər saxlanılıb.
Əl-Hərbi bildirib ki, ZATCA qaçaqmalçılığın qarşısını almaq və cəmiyyətin təhlükəsizliyini qorumaq məqsədilə ölkənin bütün giriş məntəqələrində idxal və ixraca gömrük nəzarətini gücləndirməyə davam edir. Bu istiqamətdə Daxili İşlər Nazirliyi və Narkotiklərə Nəzarət Baş İdarəsi ilə əməkdaşlıq həyata keçirilir.
Qurum əhalini mümkün qaçaqmalçılıq halları barədə 1910 nömrəli xüsusi qaynar xətt və digər rəsmi kanallar vasitəsilə məlumat verməyə çağırıb. Bildirilib ki, məlumatların məxfiliyinə tam zəmanət verilir və dəqiq olduğu təsdiqlənən məlumatlara görə maliyyə mükafatı təqdim edilə bilər.
