BAKI,VOA,Yusif Şərifzadə

İsrail ordusu Livanın cənubunda yerləşən Nəbatiyyə şəhəri yaxınlığındakı Əli Tahir silsiləsində keçirilən əməliyyat zamanı "Hizbullah" hərəkatının bir neçə üzvünün öldürüldüyünü iddia edib.

VOA xəbər verir ki, İsrail ordusunun yaydığı bəyanatda əməliyyatın UNESCO-nun Dünya İrs Siyahısına daxil edilmiş Bofor qalasının yerləşdiyi Əli Tahir silsiləsində həyata keçirildiyi bildirilib.

Ordunun məlumatına görə, əməliyyat zamanı İsrail Silahlı Qüvvələrinin bir zabiti orta ağır yaralanıb.

Açıqlamada qeyd olunub ki, yaralı zabit tibbi yardım göstərilməsi üçün xəstəxanaya təxliyə edilib və onun ailəsinə məlumat verilib.

İsrail ordusu öldürüldüyünü iddia etdiyi şəxslərlə bağlı əlavə məlumat açıqlamayıb.

"Hizbullah" isə hələlik İsrailin bu iddiasına münasibət bildirməyib. Məlumat müstəqil mənbələr tərəfindən təsdiqlənməyib.