BAKI, AzerVoice
İsrail və Yunanıstan Türkiyənin maraqlarına qarşı yönələn yeni addımlar atmağa hazırlaşır.
AzerVoice xəbər verir ki, Yunanıstan
Egeydə İsrail və Cənubi Kipr ilə birlikdə sualtı elektrik kabeli
layihəsini yenidən işə salmağa qərar verib.
Afina hökuməti bu layihəni “Kiprin enerji təhlükəsizliyi” üçün
mühüm hesab etsə də, layihənin geosiyasi məqsədlər daşıdığı
vurğulanır. Yunan mətbuatı İsrailin bu məsələdə Afinaya diplomatik
dəstək verəcəyini və lazım gələrsə, ABŞ-ı da prosesə cəlb edəcəyini
yazıb.
Qərbi Qüdsdə Yunanıstanın baş naziri Kiriakos Mitsotakis və İsrailin baş naziri Binyamin Netanyahu arasında keçirilən görüşdə iki ölkənin müdafiə və enerji sahələrində əməkdaşlığı genişləndirməsi razılaşdırılıb. Görüşdə həmçinin Türkiyəyə qarşı mümkün addımlar müzakirə olunub. İsrail Şərqi Aralıq dənizində Yunanıstana tam dəstək verəcəyini bəyan edib.
Yunanıstan, İsrail və Cənubi Kipr arasında planlaşdırılan sualtı elektrik kabeli layihəsi Türkiyə ilə Liviya arasında imzalanmış Dəniz Yurisdiksiyasının Delimitasiyası Müqaviləsi ilə kəsişir. Layihənin həyata keçirilməsi üçün Afina və İsrail Fransa və ABŞ-ın dəstəyini almağa çalışır. Yunan hökuməti layihənin təhlükəsizliyini təmin etmək üçün tədqiqat gəmilərini hərbi müşayiətlə qoruyacağını açıqlayıb.
Türkiyə isə bölgədə dəniz hüquqlarının pozulmasına icazə verməyəcəyini bildirərək, hərbi və diplomatik addımlar atmağa hazır olduğunu nümayiş etdirib. Ötən il Türkiyənin kontinental şelfində araşdırma aparmaq istəyən Yunanıstan tədqiqat gəmiləri Türk donanması tərəfindən dayandırılıb və böhrandan sonra Afina rəsmi Ankaradan icazə almağa məcbur olub.
Həmçinin, Yunanıstan, ABŞ, Fransa və İsrailin rəhbərliyi ilə Şərqi Aralıq dənizində genişmiqyaslı “İniochos 2025” hava təlimləri başlayıb. Yunanıstanın Andravida Hava Bazasında keçirilən təlimlərə Birləşmiş Ərəb Əmirlikləri, Hindistan, İspaniya, İtaliya, Qətər, Polşa və Monteneqro da qatılıb. Təlimdə ilk dəfə Qətər və İsrail birlikdə iştirak edir.
Qeyd edək ki, Fransada keçirilən “Şərqi Aralıq dənizi beşliyi” sammitində Suriyanın dəniz sərhədləri də müzakirə olunub. Fransa, Yunanıstan, Livan və Cənubi Kipr Suriyanın dəniz sərhədlərinin BMT-nin Dəniz Hüququ Konvensiyasına uyğun müəyyən edilməsini tələb edib. Sammitdə Suriyaya qarşı sanksiyaların mərhələli şəkildə aradan qaldırılması üçün müəyyən şərtlər irəli sürülüb.
