BAKI, AzerVoice
İran ABŞ ilə bərabər əsasda danışıqlar aparmağa hazırdır.
AzerVoice xəbər verir ki, bunu İran prezidenti Məsud Pezeşkian deyib.
Lakin bu açıqlama topu yenidən Trampın meydanına atmaq cəhdi kimi görünür, çünki birbaşa danışıqlarla bağlı qərarı yalnız ali rəhbər Əli Xamenei verə bilər.
Bundan əvvəl Tramp bildirib ki, İranla birbaşa danışıqlara üstünlük verir.
“Mən əminəm ki, iranlı rəsmilər birbaşa danışıqlar istəyir, amma narahatdırlar, zəif görünürlər. Mən istəmirəm ki, onlar bu cür vəziyyətdə olsunlar”, - deyə Tramp bildirib.
Pezeşkian isə ABŞ-ın şantaj siyasətini qınayıb.
“Əgər qarşı tərəf danışıqlar aparmaq istəyirsə, niyə hədələyir? Amerika bu gün təkcə İranı yox, bütün dünyanı təhqir edir”, – deyə o bildirib.
Qeyd edək ki, qərb dövlətləri, xüsusilə ABŞ, illərdir İranı nüvə silahı əldə etməkdə ittiham edir. İran isə bu iddiaları rədd edərək, nüvə fəaliyyətlərinin yalnız mülki məqsədlərdə istifadə edildiyini bildirib.
2015-ci ildə İranla BMT Təhlükəsizlik Şurasının daimi üzvləri (ABŞ, Rusiya, Çin, Fransa, Böyük Britaniya və Almaniya) arasında beynəlxalq nüvə sazişi imzalanmışdı. Saziş İranın nüvə proqramını məhdudlaşdırmaq müqabilində ona tətbiq olunan sanksiyaların aradan qaldırılmasını nəzərdə tuturdu. Lakin Trampın prezidentliyi dövründə, 2018-ci ildə ABŞ bu razılaşmadan birtərəfli qaydada çıxaraq İrana qarşı sanksiyaları bərpa etmişdi. Buna cavab olaraq İran da sazişin öhdəliklərinə əməl etməyi dayandırmış və nüvə proqramını sürətləndirmişdi.
