Bakı, VOA

İsrail dayandırılmalı və daimi atəşkəsi qəbul etməyə məcbur edilməlidir.

VOA xəbər verir ki, bu sözləri Türkiyənin Prezidenti Rəcəb Tayyib Ərdoğan Astanada Şanxay Əməkdaşlıq Təşkilatının (ŞƏT) sammitində deyib.

"Biz qaydalara əsaslanan beynəlxalq sistemin sütunlarının sarsıdıldığı bir dönəmdən keçirik. Terrorizm, islamafobiya və ksenofobiya, qeyri-qanuni miqrasiya, iqlim dəyişikliyi, enerji və ərzaq təhlükəsizliyi, təchizat zəncirlərindəki axsamalar kimi çağırışlar mövcud geosiyasi sarsıntıların şiddətini artırır." deyən Ərdoğan sözlərinə davam edərək Qəzza məsələsini bir daha gündəmə gətirib.

O, "Bunun ən son və ən ağrılı nümunəsi hamımızın gözümüzün qarşısında işğal altındakı Fələstin torpaqlarında, xüsusən də Qəzzada göstərilir. Qəzzada heç bir fərq qoymadan həyata keçirilən hücumlar nəticəsində 40 minə yaxın günahsız insan həyatını itirib. Təxminən 90 min fələstinli yaralanıb. 16 mindən çox günahsız uşağın altında can verdiyi xarabalıqlar, dağıntılar mahiyyət etibarı ilə əslində legitimliyini itirmiş beynəlxalq sistemin dağıntılarıdır."- deyə əlavə edib.

"Bu dağıntıya son qoymaq üçün İsrail hökuməti dayandırılmalı və daimi atəşkəsi qəbul etməyə məcbur edilməlidir."- deyən Ərdoğan İsrail administrasiyasına təzyiqlərin artırılaraq davam etməli olduğunu qeyd edib.