BAKI, AzerVoice
Pakistan hökuməti Hindistanın yaxın saatlarda hərbi hücum
planlaşdırdığını açıqlayıb. Pakistanın informasiya naziri Ataullah
Tarar bildirib ki, etibarlı kəşfiyyat məlumatlarına əsasən,
Hindistan qarşıdakı 24-36 saat ərzində Kəşmirdəki Pahalgam
hadisəsini bəhanə edərək hücuma keçə bilər.
Nazir “X” sosial platformasında yayımladığı açıqlamada qeyd edib ki, “Hər hansı təcavüz qətiyyətli cavabla qarşılanacaq və regionda baş verəcək fəlakətli nəticələrə görə Hindistan məsuliyyət daşıyacaq”.
Xatırladaq ki, ötən həftə Hindistanın Kəşmir bölgəsində turistlərə qarşı silahlı hücum nəticəsində 26 nəfər həyatını itirib. Hindistan rəsmiləri hadisədə Pakistan mənşəli şəxslərin iştirak etdiyini iddia edib, İslamabad isə bu iddiaları rədd edərək müstəqil beynəlxalq araşdırma tələb edib.
Hindistanın Baş naziri Narendra Modi hücumun məsuliyyətini daşıyanların tapılıb cəzalandırılacağını bildirib. Kəşmir bölgəsi üzərində Hindistan və Pakistan arasında uzun illərdir davam edən ərazi mübahisəsi iki ölkə arasında bir neçə dəfə müharibəyə səbəb olub.
Digər tərəfdən, Pakistanın müdafiə naziri Xoca Məhəmməd Asıf Hindistanın hərbi müdaxiləsinin yaxın olduğunu bildirib. O əlavə edib ki, Pakistan yüksək hazırlıq vəziyyətindədir, lakin nüvə silahlarından yalnız ölkənin varlığına birbaşa təhlükə olduğu halda istifadə olunacaq.
Kəşmir ətrafında gərginliklər barədə bilinməli olanlar
