BAKI, AzerVoice
Xalqımızı on minlərlə canını, trilyonlarla dollar sərvətini udan 40 illik terror girdabından tamamilə çıxarmaqda qərarlıyıq.
AzerVoice xəbər verir ki, bu sözlər Türkiyə Prezidenti Rəcəb Tayyib Ərdoğanın verdiyi açıqlamada yer alıb.
Ərdoğan PKK terror təşkilatının özünü ləğv etməsini və bundan sonrakı prosesin izlənildiyini bir daha xatırladıb.
"Bölücü terror təşkilatı (PKK - red.) son günlərdə artıq özünü ləğv edəcəyini və silahını yerə qoyacağını açıqladı. Bu bəyanatı, xalqımızın başına 40 ildir bəla olan bir müsibətdən əbədi qurtulma və bölgəmizin daimi sülhə qovuşması baxımından müsbət qarşıladıq. Özünü ləğvetmə prosesinin Milli Kəşfiyyat Təşkilatımız (MİT) və təhlükəsizlik qurumlarımız tərəfindən ciddi şəkildə izlənəcəyini bildirdik" - deyə, Ərdoğan qeyd edib.
"Türkiyə Cümhuriyyətinin mövqeyi son dərəcə açıq və aydındır. Biz terroru, zorakılığı və silahı tamamilə tərk edənlərə anlayışla yanaşırıq. Amma səhvində israr edənlərə qarşı da mübarizədən bir addım belə geri çəkilmirik. Tarixi, mədəniyyəti, zəfərləri ilə min illik dərin təcrübəyə malik bir millət və bir dövlət bu məsələyə necə baxırsa, biz də eyni şəkildə baxırıq." - deyə, o əlavə edib.
