BAKI,AzerVoice, Orxan Qədirzadə
Türkiyənin milli müdafiə sənayesi nazirliyinin koordinatorluğu ilə həyata keçirilən TF35000 turbofan mühərriki layihəsi üzrə proseslərlə bağlı yeni məlumatlar açıqlanıb. Türk Aviasiya və Motor Sənayesi A.Ş. (TEI) tərəfindən hazırlanan mühərrikin 2030-cu ildə milli döyüş təyyarəsi KAAN-a inteqrasiya olunması nəzərdə tutulur.
AzerVoice-a verilən məlumata görə, TF35000 beşinci nəsil döyüş təyyarələri üçün nəzərdə tutulmuş yerli turbofan mühərrikidir və yüksək temperaturadavamlı superalaşımlar, inkişaf etmiş termal baryer sistemləri, eləcə də yeni nəsil soyutma texnologiyaları ilə təchiz olunur. Mühərrik yanacaq səmərəliliyi, dözümlülük və uzunmənzilli əməliyyat tələbləri baxımından optimallaşdırılır.
Layihə çərçivəsində TEI-nin T700 və TS1400 kimi əvvəlki mühərrik proqramlarında topladığı texnoloji baza və istehsal təcrübəsi tətbiq edilir. Bu çərçivədə material elmi üzrə sınaq infrastrukturu, rəqəmsal dizayn və yüksək performanslı komponentlərin istehsal imkanları inkişaf etdirilib.
Mühərrikin hədəflənən 35 min funt itki gücü beynəlxalq aviasiya sənayesində mövcud olan aparıcı modellərlə müqayisə edilir. Bu göstəricilər F-22 üçün Pratt & Whitney F119 mühərrikinə yaxın səviyyədədir. Eurofighter Typhoon üçün nəzərdə tutulmuş EJ200 (26.000 lbf) və Rafale M88 (17.000–20.000 lbf) mühərriklərini üstələyir və F-16 platformasında istifadə olunan F110 seriyalı mühərriklərlə eyni kateqoriyaya daxildir (29.000 lbf-ə qədər).
Mütəxəssislər bildirirlər ki, TF35000-in inkişafı Türkiyənin beşinci nəsil qırıcı layihəsinin kritik mərhələsini təşkil edir və 2030-cu ildə tam yerli güc qurğusuna keçid hədəfinə nail olunması üçün işlər mərhələli şəkildə davam etdirilir.
