Bakı. AzerVoice:
Dünya ictimaiyyətini Qəzza qətliamının qarşısını almaq üçün bir daha qətiyyətlə hərəkət etməyə çağırıram.
AzerVoice xəbər verir ki, bu sözləri Türkiyənin xarici işlər naziri Hakan Fidan Buxarestdə Rumıniyanın xarici işlər naziri Luminita Odobesku ilə görüşündən sonra keçirilən birgə mətbuat konfransında çıxışı zamanı deyib.
Türkiyə Xin rəhbəri onu da bildirib ki, Qəzzada bombardmandan sağ çıxan insanlar aclıq və epidemiya ilə mübarizə aparır.
"İsrailin Qəzzaya humanitar yardım və tibbi ləvazimatların çatmasını əngəlləməsi beynəlxalq ictimaiyyət tərəfindən qəbul edilməməlidir. 2 milyon insanın açıq şəkildə bombardman altında aclıq və epidemik xəstəliklərlə üz-üzə qoyulmasına səssiz qala bilmərik", - deyə o əlavə edib.
Qeyd edək ki, oktyabrın 7-də İsrailə hücumlar olunub. Əvvəlcə Qəzza bölgəsindən reaktiv mərmilərlə kütləvi atəş açılıb, daha sonra döyüşçülər əraziyə qurudan, havadan və sudan daxil olublar.
İsrail müharibə vəziyyəti elan edib. Bundan başqa, İsrailin müdafiə naziri Yoav Qallant ehtiyatda olan hərbçilərin kütləvi çağırışını elan edib.
Oktyabrın 7-də İsrail-Fələstin münaqişəsinin yeni mərhələsi başlayandan bəri Qəzza zolağında ölənlərin sayı 26 min 751 nəfərə çatıb.
