Bakı, VOA:

İsrail əsgərlərinin Qəzzada dağıtdıqları bir məscidi mətbəx kimi istifadə etdikləri ilə bağlı video görüntü yayılıb.

VOA xəbər verir ki, Qəzzanın cənubundakı Rəfah Sərhəd Qapısının Fələstin tərəfində İsrail əsgərləri tərəfindən dağıdılmış məscidin yemək bişirilmə yeri kimi istifadə edildiyi ortaya çıxıb.

Yayılan videoda məscidin dağıdıldığı və divarlarına müxtəlif yazılar yazıldığı, həmçinin məscidin içərisində saxlanılan yemək qutularının üzərində olan etiketlərdə istehsal tarixinin 22 May olduğu görünür. Eyni şəkildə videoda məscidin kənarında çoxlu sayda hərbi maşın və tankların dayandığı da müşahidə edilir.

Qeyd edək ki, İsrail ordusu mayın altısında verdiyi açıqlamada məcburi köçkün fələstinlilərin sığındığı Rəfahın şərqindəki bəzi məhəllələrin boşaldılmasını tələb etmişdi və mayın yeddisində səhər saatlarında Qəzzanın Rəfah bölgəsinə qurudan hücuma keçərək Misirlə sərhəd qapısının Qəzza tərəfini ələ keçirmişdi.