BAKI, AzerVoice

İsrailin Baş naziri Benyamin Netanyahu bildirib ki, İrana qarşı hərbi əməliyyatın planlaşdırılması hələ ötən ilin noyabrından başlanmış və ilkin olaraq hücumun bu ilin aprel ayının sonunda həyata keçirilməsi nəzərdə tutulmuşdu.

AzerVoice xəbər verir ki, Netanyahu bu barədə hökumət dəftərxanası tərəfindən yayımlanan videomüraciətində deyib.

“Əslində bu əmri müdafiə strukturlarının rəhbərliyinə altı aydan çox əvvəl, noyabrın 24-də vermişəm. Sənəd də buradadır” - deyə, Baş nazir bildirib. O, bu zaman A4 vərəqində olan sənədi kameralara göstərib və əlavə edib: “Bu, İranın nüvə proqramının faktiki olaraq ləğvi ilə bağlı əmrdir”.

Netanyahu həmçinin qeyd edib ki, əməliyyata hazırlıq qərarı İsrail ordusunun keçən ilin sentyabrında Livanda "Hizbullah"ın baş katibi Həsən Nəsrullah da daxil olmaqla rəhbərliyini öldürməsindən dərhal sonra verilib. Onun sözlərinə görə, İrana qarşı zərbələrin başlanması əvvəlcə cari ilin aprel ayının sonuna planlaşdırılmışdı.