BAKI, AzerVoice
ABŞ-ın Yaxın Şərqdə yerləşən qüvvələri İsrailin İrana qarşı həyata keçirdiyi hücumlarda dəstək göstərib.
AzerVoice xəbər verir ki, bu barədə İranın xarici işlər naziri Seyid Abbas Araqçi bildirib.
“İsrailin İrana qarşı təcavüzü ABŞ-ın razılığı və dəstəyi olmadan mümkün ola bilməzdi. Əlimizdə, regiondakı amerikalı qüvvələrin bu hücumların həyata keçirilməsində İsrailə yardım etdiyini sübut edən kifayət qədər tutarlı dəlillər var” - deyə, Araqçi vurğulayıb.
Xatırladaq ki, İsral Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.
Bu hücumlara cavab olaraq isə İran Ordusu İsrailə qarşı "Doğru vəd 3" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.
