İran Ali Milli təhlükəsizlik Şurası İsraillə atəşkəsi qəbul edib

İranın Ali Milli Təhlükəsizlik Şurası İsraillə atəşkəs rejiminin qəbul edilməsi barədə qərar verib.

AzerVoice xəbər verir ki, bu barədə İran KİV məlumat yayıb.

Şuranın bəyanatında İsrailə və onun tərəfdarlarına qarşı döyüş əməliyyatlarının dayandırılması rejiminin tətbiqi ilə bağlı milli qərar qəbul edildiyi bildirilir.

"İran silahlı qüvvələri düşmənin qəddarlığına alçaldıcı və nümunəvi cavab veriblər" - deyə, bəyanatda qeyd olunub ki.

Eyni zamanda, sənəddə Tehranın atəşkəs rejimini pozacaq istənilən təxribata qarşı qətiyyətli və çəkindirici cavab verməyə hazır olduğu vurğulanıb.

Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.

Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.

ABŞ isə münaqişənin gərginləşməsindən doqquz gün sonra – 22 iyun gecəsi İrandakı üç nüvə obyektinə hücum etməklə münaqişəyə qoşulub. 23 iyun axşamı İran ABŞ-ın Qətərdə yerləşən və Yaxın Şərqin ən böyük Amerika bazası olan Əl-Udeyd bazasına raket zərbəsi endirib. ABŞ hakimiyyət orqanlarının verdiyi məlumata görə, hücum nəticəsində itki və ya ciddi dağıntı qeydə alınmayıb.

ABŞ prezidenti Donald Trampın bəyanatına əsasən, İsrail və İran tam atəşkəsə razılıq veriblər. İsrail hakimiyyəti ABŞ-ın təklifini qəbul etdiyini və qarşıya qoyulan bütün məqsədlərə nail olunduğunu bəyan edib.