BAKI, AzerVoice

ABŞ Hərbi Dəniz Qüvvələrinin "USS Nimitz" təyyarədaşıyan gəmisi Yaxın Şərqdə ABŞ Silahlı Qüvvələrinin Mərkəzi Komandanlığının məsuliyyət zonasında yerləşib.

AzerVoice xəbər verir ki, bu barədə ABŞ Hərbi Dəniz İnstitutunun informasiya xidməti məlumat yayıb.

Məlumata görə, "USS Nimitz" və onu müşayiət edən üç raket esminesi artıq Ərəb dənizinə daxil olub. Hazırda Oman sahilləri yaxınlığında digər bir aviadaşıyıcı zərbə qrupu da mövcuddur. Bu qrup "USS Carl Vinson" atom təyyarədaşıyanı, bir raket kreyseri və iki esminedən ibarətdir.

Bundan əlavə, bölgədə 154 ədəd "Tomahawk" qanadlı raketi daşımaq qabiliyyətinə malik "USS Georgia" atom sualtı qayığı da mövcuddur. Bu raketlərin fəaliyyət radiusu 1 600 kilometrdir.