BAKI, AzerVoice, Nailə Babazadə
Yəmənin cənubundakı Ebyen vilayəti sahillərində qeyri-qanuni miqrantları daşıyan qayığın çevrilməsi nəticəsində 55 nəfər həyatını itirib.
AzerVoice xəbər verir ki, Ebyenin Zəncibar rayonunun Səhiyyə müdiri Əbdülqadir Bacmil məlumat verib. Qeyri-qanuni miqrantları daşıyan qayığın batması nəticəsində ölənlərin sayı 55-ə çatıb və ölənlər arasında bir yəmənlinin də olduğu müəyyən edilib.
Təhlükəsizlik mənbələrindən alınan məlumata görə, Ebyen vilayəti sahillərində pis hava şəraiti səbəbilə bir qayıq aşıb.
Bacmil həmçinin qeyd edib ki, həyatını itirənlərin hamısı dəfn olunub, qayığın içində 100-dən çox etiopyalı qeyri-qanuni miqrant olub və onlarla insan hələ də itkin düşüb. Axtarış-xilasetmə işləri davam edir.
Qeyd edək ki, təhlükəsizlik mənbələri əvvəllər Yəmənin cənubundakı Əbyen sahillərində qeyri-qanuni miqrantları daşıyan bir qayığın çevrildiyini, 20 nəfərin öldüyünü və onlarla insanın itkin düşdüyünü bildirmişdi.
Yəmən, əsasən Efiopiya və Somali olmaqla, Afrika Buynuzu ölkələrindən gələn qeyri-qanuni miqrantlar üçün keçid nöqtəsi sayılır. Afrika mənşəli qeyri-qanuni miqrantların əksəriyyəti Səudiyyə Ərəbistanı başda olmaqla, Körfəz ölkələrinə getmək ümidi ilə Cibuti üzərindən Yəmənə keçir.
