BAKI, AzerVoice, Səməd Əyyubov
İsrail, vasitəçi ölkələrin Qəzza zolağında 48 saatlıq humanitar atəşkəs təklifini qəbul etməyib.
AzerVoice xəbər verir ki, bu barədə "Al Arabiya" telekanalı mənbələrə istinadən məlumat yayıb.
Məlumata görə, vasitəçilər bu təklifi İsrail tərəfinə təqdim etsələr də, cavab mənfi olub. Bununla belə, onlar atəşkəsə nail olmaq üçün səylərini davam etdirirlər.
"Asharq al-Awsat" qəzeti isə HƏMAS-dakı mənbəyə istinadən yazıb ki, “vasitəçilərin üzərində işlədiyi hərtərəfli razılaşma” barədə yayılan xəbərlər şişirdilib və real vəziyyəti əks etdirmir. Mənbə bildirib ki, HƏMAS Misirin Qəzza zolağının idarə olunması ilə bağlı planına sadiqdir və İsrail qoşunlarının çıxarılmasına nəzarət etmək üçün Misirlə birgə komitə yaratmağa hazırdır.
HƏMAS-ın Qəzzadakı rəhbəri Xəlil əl-Həyyə başçılıq etdiyi nümayəndə heyəti ilə Misirin dəvəti əsasında çərşənbə axşamı Qahirəyə gedib. Həmin gün Misirin xarici işlər naziri Bədr Əbdül Ati bəyan edib ki, Qahirə, Doha və Vaşinqtonla koordinasiyada tərəfləri Qəzza zolağında 60 günlük atəşkəs təklifinə qaytarmaq üçün çalışır.
Çərşənbə günü Misirin “Əl-Qahirə əl-İxbariyə” telekanalı mənbəyə istinadən xəbər verib ki, HƏMAS nümayəndə heyəti Qahirədə Misir kəşfiyyat rəhbəri Həsən Raşid ilə görüşərək, atəşkəs və döyüşlərin dayandırılması üzrə danışıqlara tezliklə qayıtmaq istədiklərini bildirib.
Qeyd edək ki, HƏMAS ilə İsrail arasında danışıqlar ötən ay Qətərdə dayandırılmışdı. Baş nazir Benyamin Netanyahu iyulun 6-da Dohada aparılan danışıqlarda HƏMAS-ın atəşkəs təklifinə verdiyi cavabı əsas gətirərək İsrail nümayəndə heyətini geri çağırmışdı. ABŞ da “HƏMAS-ın son cavabı atəşkəs istəyi olmadığını göstərir” arqumenti ilə öz nümayəndələrini Dohadan çıxarmışdı. Lakin HƏMAS bəzi vasitəçilərin cavabı “konstruktiv” adlandırdığını və qəbul etdiyini bildirib.
