BAKI, AzerVoice, Nailə Babazadə
Qəzzadakı Fələstin hökuməti İsrailin Əqsa Şəhidləri Xəstəxanasını yenidən hədəf aldığını açıqlayıb.
AzerVoice xəbər verir ki, hökumətin Media Ofisinin yaydığı məlumata görə, İsrailin döyüş təyyarələri bu gün xəstəxanaya hava hücumu təşkil edib. Bu, 7 oktyabr 2023-cü ildən bəri həmin xəstəxanaya edilən 13-cü hücumdur.
Açıqlamada bildirilib ki, hücum İsrailin Qəzzadakı səhiyyə infrastrukturunu sistemli şəkildə hədəfə almaq niyyətində olduğunu göstərir. “İsrail ordusu bu gün, cümə günü, xəstəxananın içində yerləşən bir qaçqın çadırını – xüsusilə poliklinika şöbəsinin üzərində yerləşən hissəni – bombalayıb”, – deyə məlumatda qeyd olunub.
Hücum nəticəsində iki nəfər həlak olub, çox sayda insan yaralanıb. Xəstəxana ciddi maddi ziyana məruz qalıb və onlarla xəstənin həyatı birbaşa təhlükəyə düşüb.
Qəzza hökuməti hücuma görə İsraili və onu dəstəkləyən ölkələri məsuliyyət daşıyan tərəf kimi göstərib, BMT və beynəlxalq təşkilatları isə təcili müdaxiləyə və xəstəxanalara müdafiə təmin etməyə çağırıb.
