BAKI, AzerVoice, Səməd Əyyubov
Qəzza zolağında İsrail tərəfindən saxlanılan 13 fələstinli Beynəlxalq Qızıl Xaç Komitəsinin (BQXK) vasitəçiliyi ilə azad edilib.
AzerVoice xəbər verir ki, bu barədə komitənin verdiyi açıqlamada deyilir.
“13 fələstinli sərbəst buraxılaraq Kərəm Əbu Səlim sərhəd-keçid məntəqəsindən Əl-Əqsa Şəhidlər Xəstəxanasına aparılıb. Komandamız onların ailələri ilə əlaqə saxlamasına və yenidən bir araya gəlməsinə şərait yaradıb” - deyə, açıqlamada bildirilib.
Qeyd olunub ki, Qızıl Xaç Komitəsi mart ayından bəri 5-i qadın olmaqla ümumilikdə 255 fələstinlinin İsrail tərəfindən birtərəfli qaydada azad olunmasına vasitəçilik edib və onların ailələrinə qovuşmasına yardım göstərib. Komitə açıq şəkildə saxlanılan şəxslərin adlarının açıqlanmasını və ailə görüşlərinə icazə verilməsini tələb edib. Açıqlamada vurğulanıb ki, beynəlxalq humanitar hüquqa görə əsirlərə insani münasibət göstərilməli, məqbul saxlanma şəraiti təmin olunmalı və onların ailələri ilə ünsiyyət imkanı qorunmalıdır.
Qeyd edək ki, əvvəllər azad edilmiş fələstinlilərin sözlərinə görə, çox sayda məhbus İsrail həbsxanalarında ağır işgəncələrə, kifayət qədər qida verilməməsinə və tibbi səhlənkarlığa məruz qaldıqlarından ciddi sağlamlıq problemləri ilə azadlığa buraxılır.
