BAKI, AzerVoice, Nərmin Ağayeva
ABŞ-ın Suriya üzrə xüsusi nümayəndəsi Tom Barak, İsrailin Hizbullahın Livanda tərksilahı ilə eyni vaxtda Livanın cənubundan çəkilmək üçün addımlar atacağını bildirib.
AzerVoice xəbər verir ki, Livan prezidenti Cozef Aun, Beyrutdakı Baabda Prezident sarayında ABŞ senatorları Jeanne Shaheen və Lindsey Graham, ABŞ-ın Suriya üzrə xüsusi nümayəndəsi Tom Barak, Yaxın Şərq üzrə xüsusi nümayəndəsinin müavini Morqan Ortaqus və ABŞ-ın Beyrutdakı səfiri Liza Conson ilə görüşüb. Görüşdən sonra keçirilən mətbuat konfransında Barak, “İsrailin Livanın cənubundan çıxmasını təmin etmək üçün çalışacağıq, lakin ən önəmlisi Hizbullahın tərksilahıdır. İsrail Hizbullahın tərksilahı ilə eyni vaxtda addımlar atacaq,” deyib.
Barak, Livan hökumətinin Hizbullahın tərksilahı ilə bağlı 11 bəndlik plan təqdim etdiyini və buna əməl edəcəyinə söz verdiyini qeyd edib. O, bu planın “hərbi” təşəbbüs olmadığını, vətəndaş müharibəsinə yol açmamaq üçün diqqətli olunacağını vurğulayıb. Barak, “Hizbullahın silahlarını təhvil verdiyi təsdiqlənərsə, İsrail Livan ərazisindən çəkiləcək,” iddiasında bulunub.
Barak, Livan ordusunun sərhədləri qorumaq qabiliyyətinin gücləndirilməsinin vacibliyini vurğulayaraq, BMT-nin Livan üçün müvəqqəti sülhməramlı qüvvələri (UNIFIL) mandatının bir il uzadılacağını təsdiqləyib. O, həmçinin Körfəz ölkələrinin Livan iqtisadiyyatına investisiyalar vasitəsilə dəstək verəcəyini və bu investisiyaların bütün Livan xalqı, o cümlədən cənub bölgələri üçün faydalı olacağını bildirib.
ABŞ senatoru Jeanne Shaheen, Livan hökumətinin Hizbullahı tərksilah etmək qərarını dəstəklədiklərini və Livan ordusunun maliyyə və maddi-texniki dəstəyə ehtiyacı olduğunu qeyd edib. O, gələn həftə hökumətin təsdiqləyəcəyi hərbi planı gözlədiklərini əlavə edib.
Senator Lindsey Graham isə Hizbullahın tərksilahının Livan xalqının təşəbbüsü olduğunu müdafiə edərək, “Hizbullah tərksilah edilmədikcə İsrail Livana fərqli baxmayacaq,” deyib. Graham, Hizbullahın və Fələstin qruplarının tərksilah edilməməsi halında Livanda irəliləyişin mümkün olmayacağını iddia edib. O, tərksilah başa çatdıqdan sonra İsrail ilə Livanın cənubundakı beş mübahisəli nöqtə üzrə danışıqların aparılacağını bildirib.
Barak, Suriya prezidenti Əhməd əl- Şəraanın Livanla düşmən münasibət qurmaq istəmədiyini və tarixi əlaqələri dəstəklədiyini, sərhəd danışıqlarına hazır olduğunu qeyd edib. Bu, Livan-Suriya əlaqələrində müsbət bir addım kimi qiymətləndirilir.
Qeyd edək ki, Livan hökumətinin Hizbullahın tərksilahına dair planı regionda gərginliyi azaltmaq məqsədi daşısa da, Hizbullahın buna necə reaksiya verəcəyi hələlik qeyri-müəyyəndir. X platformasında dərc olunan məlumatlara görə, Hizbullah tərksilah planına qarşı çıxaraq “silahları təhvil verməyəcəyik” mesajı yayıb.
