BAKI, AzerVoice, Səməd Əyyubov
İsrailin baş naziri Benyamin Netanyahu Qəzza şəhərinin sakinlərinə dərhal ərazini tərk etmələri barədə xəbərdarlıq edib.
AzerVoice xəbər verir ki, bu çağırış İsrailin bölgəyə qarşı hava hücumlarını gücləndirəcəyini açıqlamasından bir neçə saat sonra edilib.
“Qəzza sakinlərinə deyirəm: bu fürsətdən istifadə edin və məni diqqətlə dinləyin. Sizə xəbərdarlıq edildi – dərhal çıxın” - deyə Netanyahu bildirib. O əlavə edib ki, İsrail qüvvələri hazırda sıralarını bərpa edir və şəhərdə quru əməliyyatına hazırlaşmaq üçün toplaşır.
Baş nazirin sözlərinə görə, son iki gündə İsrail ordusu Qəzzada HƏMAS tərəfindən istifadə olunan 50 binanı bombalayıb.
“İki gün ərzində 50 binanı məhv etdik. Bu, Qəzzada genişmiqyaslı quru əməliyyatının yalnız başlanğıcıdır. Mən bir daha deyirəm: sizə xəbərdarlıq edildi – dərhal çıxın” - deyə, o vurğulayıb.
İsrailin müdafiə naziri İsrael Katz da “X” sosial şəbəkəsində paylaşım edərək HƏMAS-a son xəbərdarlığını ünvanlayıb:
“Bu, Qəzzada və xaricdə gizlənən qatillərə və silahlılara son xəbərdarlıqdır: girovları azad edin, silahlarınızı təhvil verin. Əks halda, Qəzza məhv ediləcək və siz də aradan qaldırılacaqsınız.”
Xatırladaq ki, İsrail ordusu bu gün səhər saatlarından Qəzza zolağının müxtəlif bölgələrinə hücumlar həyata keçirib. Səhiyyə mənbələri və şahidlərin məlumatına görə, hücumlarda ümumilikdə 25 fələstinli həlak olub, çox sayda insan yaralanıb.
