BAKI, AzerVoice, Fərid Mikayılov
Yəmən Silahlı Qüvvələri İsrailin işğal altındakı ərazilərində hərbi hədəflərə ballistik raket və pilotsuz uçuş aparatları ilə zərbələr endirdiyini açıqlayıb.
AzerVoice xəbər verir ki, əməliyyatların Fələstin xalqına dəstək və İsrailin Qəzzada həyata keçirdiyi hücumlara cavab məqsədi daşıdığı bildirilib.
Yəmən Ordusunun sözçüsü general-briqadier Yəhya Sari qeyd edib ki, raket bölməsi “Fələstin-2” adlı səsdən sürətli ballistik raketlə Negev bölgəsində yerləşən hərbi hədəfi vurub. Hücumun uğurla nəticələndiyi, çox sayda məskunlaşan şəxsin sığınacaqlara üz tutduğu qeyd olunub.
Sari əlavə edib ki, dron bölmələri iki əlavə hücum həyata keçirib. Bunlardan biri Eylat (Umm ər-Rəşraş) yaxınlığındakı Ramon Hava Limanına iki dron vasitəsilə, digəri isə Negev bölgəsindəki hərbi hədəfə bir dronla zərbə olub.
Ənsar Allah Hərəkatının nümayəndəsi Abdullah əl-Əhnumi isə İsrailin Səna və digər şəhərlərdə mülki əhalini hədəf almasının cavabsız qalmayacağını bəyan edib.
“Bizim cavabımız İsrailin hərbi bazalarını, hava limanlarını, məskunlaşma bölgələrini və digər həssas məntəqələrini hədəf alacaq. Qanımız dəyərlidir və bu qan töküldükcə cavablarımız daha sərt olacaq”- deyə o bildirib.
Bir gün əvvəl İsrailin həyata keçirdiyi hava hücumları nəticəsində Səna və əl-Cauf vilayətlərində azı 36 nəfər həlak olub, 130-dan çox insan yaralanıb. Zərbələr yaşayış binalarına, tibbi müəssisələrə və dövlət komplekslərinə endirilib.
BMT, hücumların təşkilatın Yəməndəki ofislərinə yaxın əraziləri hədəfə alması səbəbindən ciddi narahatlıq ifadə edib. Bundan əvvəl, avqustun 28-də İsrailin hava zərbəsi nəticəsində Yəmənin Baş naziri Əhməd Qalib Nasir ər-Rahavi və bir neçə nazir həlak olmuşdu.
Yəmən Silahlı Qüvvələri bəyan edib ki, İsrail Qəzzadakı quru və hava əməliyyatlarına son qoyana qədər hərbi hədəflərə qarşı əməliyyatlar davam etdiriləcək. Onların sözlərinə görə, strateji dəniz blokadası vasitəsilə İsrailə hərbi resursların daşınmasının qarşısı alınacaq, Fələstin xalqına dəstək isə davam edəcək.
