BAKI, AzerVoice, Nailə Babazadə
İsrail ordusunun bu gün səhər saatlarından etibarən Qəzza zolağının müxtəlif bölgələrinə həyata keçirdiyi hava və artilleriya hücumları nəticəsində 3-ü uşaq olmaqla 25 fələstinli həyatını itirib. Xəstəxana mənbələri və yerli şahidlərin bildirdiyinə görə, Qəzza şəhərinə yönəlmiş hücumlar xüsusilə intensiv xarakter alıb.
AzerVoice xəbər verir ki, əldə olunan məlumatlara görə, İsrail ordusu Qəzza şəhərinin qərbindəki Rimal məhəlləsində bir fələstinli ailənin yerləşdiyi çadırı bombalayıb. Nəticədə, 6 nəfər, o cümlədən 3 uşaq həlak olub.
Şəhərin şimalında həyata keçirilən başqa bir hücumda isə iki ev hədəfə alınıb, nəticədə 10 nəfər ölüb, çox sayda insan yaralanıb. Qəzza şəhərinin Kerame bölgəsində mülki vətəndaşların toplandığı əraziyə edilən hava zərbələri 5 nəfərin ölümünə səbəb olub.
Qəzzada vəziyyət kritik olaraq qalır. İsrail ordusu Zeytun və Şeyx Ridvan Gölü bölgələrində partlayıcı yüklü hərbi texnika və robotlar vasitəsilə yaşayış evlərini dağıdır. Cənub bölgəsində hərbi texnikanın məhdud irəliləyişi müşahidə olunub.
Bölgədə genişmiqyaslı məcburi köç də qeydə alınıb. Məcburi şəkildə köçürülən fələstinlilərin istifadə etdiyi Reşid prospektində gecə saatlarından etibarən intensiv nəqliyyat sıxlığı müşahidə edilir.
Qəzza zolağının mərkəzindəki Muğraka qəsəbəsində, İsrailə məxsus pilotsuz uçuş aparatı (İHA) odun toplayan bir fələstinlini birbaşa hədəfə alaraq öldürüb. Eyni zamanda, Nusayrat Qaçqınlar Düşərgəsinin şimal və mərkəzi hissələri artilleriya atəşinə tutulub.
Qəzza zolağının cənubundakı Xan Yunus şəhərində bir neçə bölgəyə hava hücumları təşkil olunub. Mevasi bölgəsində İsrail əsgərlərinin açdığı atəş nəticəsində, aralarında bir ər-arvadın da olduğu 3 fələstinli həyatını itirib.
