BAKI, AzerVoice, Nailə Babazadə
İsrail ordusunun Qəzza zolağının müxtəlif bölgələrinə həyata keçirdiyi son hücumlar nəticəsində daha 23 fələstinli həlak olub.
AzerVoice xəbər verir ki, səhiyyə mənbələrinin və hadisə şahidlərinin verdiyi məlumata görə, İsrail ordusu bu gün səhər saatlarında Qəzzanın mərkəzi, şimal və cənub hissələrində hücumlar həyata keçirib.
İsrail hərbçiləri, həmçinin Qəzza və Xan Yunis şəhərlərində yerləşən məhəllələrə pilotsuz və bombalı quru vasitələri ilə hücum edib.
Qəzza şəhərinin qərbindəki Nəsr məhəlləsində yerləşən Əs-Suveydi bölgəsinə endirilən hava zərbəsi nəticəsində 10 nəfər həlak olub.
İsrail ordusu eyni zamanda Nəsr məhəlləsində pilotsuz vasitələri partladıb, şəhərin şimalındakı məhəllələrə isə hava hücumları təşkil edib.
Qəzzanın qərbində yerləşən Katibə bölgəsində məcburi köçkünlərin sığındığı çadırı hədəfə alan hava hücumunda 4 fələstinli həyatını itirib.
Şəhərin şərqindəki Zeytun məhəlləsində baş verən hücum nəticəsində isə 5 nəfər ölüb, çox sayda insan yaralanıb. İsrail qırıcıları Zeytun və Şucaiyyə məhəllələrinin şərq bölgələrinə də bir neçə hava zərbəsi endirib.
Qəzzanın cənub hissəsində yerləşən Sabra məhəlləsində bir evə edilən hücum nəticəsində bir neçə nəfər ölüb və ya yaralanıb.
Bundan əlavə, Qəzzada baş verən başqa bir hava hücumu zamanı daha 1 fələstinli həlak olub.
