BAKI, AzerVoice
İsrail mediası bildirir ki, ABŞ prezidenti Donald Trampın təqdim etdiyi Qəzza planının birinci mərhələsi sabah, 6 oktyabr tarixində başlayacaq. Bu mərhələ Qəzzada saxlanılan bütün əsirlərin azad edilməsi və müvəqqəti atəşkəsin təmin edilməsini nəzərdə tutur.
İsrail Yayım Təşkilatı (KAN) hökumət mənbələrinə istinadən xəbər verir ki, strateji məsələlər naziri Ron Dermer sabah Misirdə keçiriləcək danışıqlarda İsrail nümayəndə heyətinə rəhbərlik edəcək.
ABŞ-ın Yaxın Şərq üzrə xüsusi elçisi Stiv Vitkoff da danışıqlarda iştirak etmək üçün Qahirəyə yola düşüb.
Netanyahu ofisindən “dərhal icra” siqnalı
İsrail baş naziri Benyamin Netanyahunun ofisindən yayılan açıqlamada, hökumətin “Tramp planının birinci mərhələsini dərhal icra etməyə tam hazır” olduğu bildirilib.
Planın əsas məqsədi- Qəzzada saxlanılan bütün İsrailli əsirlərin dərhal azad edilməsidir.
Orduda fövqəladə müşavirə və əməliyyat hazırlığı
İsrail Ordusunun məlumatına görə, Baş Qərargah rəisi Eyal Zamir son hadisələrlə bağlı fövqəladə iclas keçirib. İclasda əməliyyat, kəşfiyyat, planlaşdırma, Cənub Komandanlığı və Hərbi Hava Qüvvələrinin rəhbərləri iştirak edib. Ordudan verilən məlumata görə, Zamir “Tramp planının icrası üçün hazırlığın artırılması” barədə göstəriş verib.
Ordunun bəyanatında vurğulanıb ki, “qoşunların təhlükəsizliyi prioritet məsələdir” və bütün resurslar Cənub Komandanlığının müdafiəsinə yönəldiləcək.
Müdafiə rejiminə keçid və danışıqların əhəmiyyəti
ABŞ-ın “Axios” nəşri yazır ki, İsrail ordusu yalnız müdafiə xarakterli əməliyyatlara keçəcək və Qəzza şəhərinin ələ keçirilməsini dayandıracaq.
“Yisrael Hayom” qəzeti isə hökumət mənbəsinə istinadla bildirir ki, bu addım HƏMAS-a əsirlərin azad edilməsinə hazırlaşmaq üçün vaxt qazandırmaq məqsədi daşıyır.
Mənbə qeyd edib ki, bu, rəsmi atəşkəs deyil, lakin HƏMAS plan qüvvəyə mindikdən 3 gün ərzində bütün əsirləri qaytarmalıdır.
Qəzza danışıqlarının nəticəsi - Tramp planının gələcəyi üçün həlledici
İsrailli rəsmilərin sözlərinə görə, sabahdan başlayacaq danışıqlar “ilk gündən HƏMAS-ın səmimiyyətini göstərəcək - ya planı qəbul edib razılaşacaq, ya da vaxt udmağa çalışacaq.”
Hazırda Qəzza müharibəsinin humanitar və siyasi nəticələri bütün regiona təsir göstərir. Tramp planı isə, tərəflər arasında uzunmüddətli sülh və əsir mübadiləsi üçün son şans kimi qiymətləndirilir.
