BAKI,AzerVoice, Orxan Qədirzadə
Qəzzadakı uşaqların peyvəndi üçün lazım olan şprislərin Qəzzaya keçirilməsinə İsrail tərəfindən icazə verilmir.
AzerVoice arabnews-a istinadən xəbər verir ki, UNICEF hazırda atəşkəs dövründən istifadə edərək genişmiqyaslı peyvənd kampaniyasına başlayıb. Lakin 1,6 milyon şprisin və peyvəndlərin saxlanması üçün günəş enerjisi ilə işləyən soyuducuların bölgəyə gətirilməsi üçün ləvazimatlar aylarla gömrükdə gözləyir. Təşkilat bildirir ki, şprislər avqust ayından bəri icazə gözləyir.
UNICEF-in sözçüsü Rikardo Pires məsələ ilə bağlı açıqlamasında deyib ki,həm şprislər, həm də soyuducular İsrail tərəfindən ‘ikili təyinatlı məhsul’ kimi qiymətləndirilir. Bu səbəbdən onların keçidi üçün icazə almaq çətinləşir, halbuki bunlar təcili ehtiyac olan tibbi ləvazimatlardır.
“İkili təyinatlı” ifadəsi İsrailin, həmin məhsulların həm mülki, həm də hərbi məqsədlə istifadə oluna biləcəyi ehtimalını ifadə edir.
Qəzzaya humanitar yardım axınlarına nəzarət edən COGAT qurumu məsələ ilə bağlı mövqe bildirməyib. Qurum daha əvvəl qida, su, tibbi ləvazimat və sığınacaq vasitələrinin girişinə məhdudiyyət qoymadığını açıqlamışdı. İsrail həmçinin HƏMAS-ı humanitar yardımları mənimsəməkdə ittiham edir. HƏMAS isə bu iddiaları rədd edir.
UNICEF bazar günü peyvənd kampaniyasının ilk mərhələsinə start verib. Məqsəd son iki ildə peyvənd ala bilməyən 3 yaşadək 40 min uşağa poliomielit, qızılca və pnevmoniyaya qarşı peyvəndlərin vurulmasıdır.
Kampaniyanın ilk günündə 2 400-dən çox uşağa peyvənd tətbiq edilib.
Piresin sözlərinə görə kampaniya davam edir, lakin bunun üçün əlavə tibbi ləvazimatlara ehtiyac var.
UNICEF bildirir ki, əvvəlki aylara nisbətən daha çox yardım daxil olsa da, həyati əhəmiyyətli bəzi məhsullar hələ də keçidə buraxılmır. Bunlara 938 min ədəd hazır körpə qidası butulkası, su maşınları üçün ehtiyat hissələri daxildir.
Xatırladaq ki, 10 oktyabrda əldə olunan atəşkəs bölgəyə humanitar yardımın kütləvi şəkildə artırılmasını nəzərdə tuturdu. Lakin beynəlxalq yardım təşkilatları bildirirlər ki, daxil olan yardım 2 milyon insanın ehtiyacını ödəmək üçün kifayət etmir.
