BAKI, AzerVoice, Nailə Babazadə
İordan çayının qərb sahilində qeyri qanuni məskunlaşan radikal yəhudilər, bu gün sübh tezdən Səlfitin şimal-qərbində yerləşən Hacı Hömeydə məscidini yandırıblar.
AzerVoice xəbər verir ki, Fələstinli fəal Nəzmi əs-Səlman bildirib ki, hadisə Deiristiya və Kəfl Həris qəsəbələri arasında baş verib.
Məlumatda qeyd edilir ki, məscidə daxil olan radikal yəhudilər, məscidin girişinə yandırıcı maddə töküblər.
“Alovun bütün məscidə yayılmasının qarşısı sakinlərin müdaxiləsi ilə alınıb. Məscidin divarlarına ərəblərə və müsəlmanlara qarşı irqçi şüarlar yazılıb”-deyə məlumatda qeyd edilir.
Qeyd edək ki, hadisə bölgədə gərginliyin artdığı bir vaxtda baş verib.
ABŞ dövlət katibi Marko Rubio zorakılığın Qəzzadakı atəşkəs səylərinə təsir göstərə biləcəyindən narahatlığını bildirib.
Rubio bu cür hadisələrin atəşkəsi pozmamasına ümid etdiyini deyib.
İsrail ordusunun Baş Qərargah rəisi Eyal Zamir radikal yəhudilərin zorakılığını pisləyib.
O, son hadisələrin İsrail cəmiyyətinin dəyərləri ilə ziddiyyət təşkil etdiyini vurğulayıb.
Zamir hərbi qüvvələrin bu cür cinayətkar davranışlara dözməyəcəyini deyib.
İsrail polisi hadisə ilə bağlı bir neçə məskunlaşanı saxladığını açıqlayıb.
İsrail ordusunun açıqlamasınd aqeyd olunur ki, maskalı israillilər fələstinlilərə hücum edib və əmlak yandırıblar.
Qeyd edək ki, 1967-ci ildən bəri İsrail Qərbi İordan sahilini işğal altında saxlayır.
Bu ərazidə 500 mindən çox israilli qeyri qanunu məskunlaşır.
Təəssüf olsun ki, məskunlaşanların zorakılığına çox vaxt hüquqi reaksiya verilmir.
BMT bildirir ki, 2025-ci ilin oktyabrı məskunlaşanların ən çox zorakılıq törətdiyi ay olub.
