BAKI, AzerVoice,Orxan Qədirzadə
Suriyanın sahil bölgəsi olan Lətakiya şəhərində yüzlərlə sakin Ələvi icmasına qarşı son günlər baş verən zorakılıq halları ilə əlaqədar etiraz aksiyası keçirib. AzerVoice xəbər verir ki, bu barədə AFP-nin bölgə müxbirləri məlumat yayıb.
Etirazçılar “Suriya xalqı birdir” və “Bütün dünyaya səslənirik: Ələvilər boyun əyməyəcək” şüarları səsləndiriblər. Şəhərdə təhlükəsizlik qüvvələri yerləşdirilsə də, aksiyaya müdaxilə olunmayıb.
Etirazlar keçmiş prezident Bəşər Əsədin keçmişdə əsas dayağı olan, Ələvi əhalinin çoxluq təşkil etdiyi sahil bölgələrində keçirilib. Xatırladaq ki, keçmiş liderin ötən ilin dekabrında İslamçı koalisiyanın hücumu ilə devrilməsindən sonra Ələvi icması bir sıra zorakı hücumların hədəfinə çevrilib. Mart ayında baş verən məzhəb zəminli hücumlarda yüzlərlə sakin qətlə yetirilmişdi.
Lətakiyadan əlavə, digər yaşayış məntəqələrində də aksiyaların keçirildiyi bildirilir. Bu, Əsəd rejiminin süqutundan sonra Ələvi bölgələrində təşkil olunan ən genişmiqyaslı etirazlar hesab edilir.
Etirazlar Suriyada Ali İslam Ələvi Şurasının sosial şəbəkələrdə yayımladığı çağırışdan sonra başlayıb. Bu çağırış Homs şəhərində bazar günü bir sünni bədəvi cütlüyünün qətlə yetirilməsi və hadisə yerində məzhəb yönümlü yazıların tapılması fonunda edilib. Hadisədən sonra Ələvilərin yaşadığı məhəllələrdə mağaza və evlərə hücumlar olub, daha sonra isə bölgədə komendant saatı tətbiq edilib. Hakimiyyət qətli “məzhəb xarakterli deyil, kriminal hadisə” olaraq qiymətləndirib.
Mart ayında Ələvilərin yaşadığı bölgələrdə baş verən məzhəb zorakılıqları nəticəsində rəsmi məlumata görə ən azı 1 426 nəfər həlak olmuşdu. Müstəqil müşahidəçilər isə ölənlərin sayının 1 700-dən çox olduğunu bildiriblər.
