Bakı, AzerVoice, Orxan Qədirzadə
İsrail Ordusu çərşənbə günü işğal altında olan İordan çayının qərb sahilinin şimalında Fələstin silahlı qruplarına qarşı yeni hərbi əməliyyata başlayıb. AzerVoice xəbər verir ki, bu barədə yerli rəsmilər və İsrail ordusu məlumat yayıb.
Fələstin tərəfinin məlumatına görə, İsrail hərbi birləşmələri səhər saatlarından etibarən bölgədə bir neçə şəhərə reydlər həyata keçirib. Yerli qubernator AFP-yə açıqlamasında əməliyyatın Cenin və ətraf yaşayış məntəqələrində intensiv şəkildə davam etdiyini bildirib.
İsrail Ordusu və təhlükəsizlik xidməti isə birgə bəyanatda əməliyyatın “şimal bölgəsində genişmiqyaslı antiterror tədbiri” olduğunu bildirib.
Hərbi qurum məlumatı təsdiqləyərək bunun yanvar 2025-də başladılan və əsasən şimaldakı fələstinli qaçqın düşərgələrini hədəf alan “Dəmir Divar” əməliyyatının davamı olmadığını vurğulayıb. Ordunun sözlərinə görə, yeni əməliyyat ayrıca planlaşdırılıb və əlavə detallar mərhələli şəkildə təqdim olunacaq.
Qeyd edək ki, İsrail 1967-ci ildən bəri İordan çayının qərb sahilini işğal altında saxlayır.
