BAKI, AzerVoice, Orxan Qədirzadə
Yəmən Prezident Şurasının sədri Rəşad əl-Alimi və Baş nazir Salim bin Bıreyk ölkənin iqtisadiyyatının bərpasında Körfəz ölkələrinin rolunun əhəmiyyətli olduğunu bildiriblər. AzerVoice xəbər verir ki, rəsmilər bunu Aden şəhərində Körfəz Əməkdaşlıq Şurasının (KƏŞ) Yəməndəki səfiri Sərhan əl-Minayxer ilə keçirilən görüşlərdə bildirib.
Görüşlərdə islahatların gedişi, ölkədəki iqtisadi vəziyyət və Yəmən rialının son günlərdə sabitləşməsi müzakirə olunub. Əl-Alimi qeyd edib ki, maliyyə və monetar sahədə əldə edilən irəliləyişlərin davam etməsi üçün Körfəz dövlətlərinin dəstəyi vacibdir. O, KƏŞ-in Yəmənin konstitusion legitimliyinə uzun illər göstərdiyi dəstəyə görə təşəkkürünü ifadə edib.
Baş nazir Bin Bıreyk də bildirib ki, Yəmən “çətin şəraitə baxmayaraq” iqtisadi və institusional islahatlara davam edir və bu prosesdə Körfəz ölkələrinin yardımı mühüm əhəmiyyət daşıyır.
KƏŞ səfiri Minayxer Şura baş katibi Casim əl-Budeyvinin salamlarını çatdıraraq Körfəz ölkələrinin Yəmənin islahat proqramına tam dəstək verdiyini vurğulayıb. O, islahatların ilk nəticələrinin “ümidverici” olduğunu qeyd edib.
Tərəflər həmçinin enerji sektorunda əməkdaşlıq imkanlarını, elektrik infrastrukturunun yenilənməsi və dayanıqlı enerji layihələrinin həyata keçirilməsini müzakirə ediblər.
