BAKI, AzerVoice, Nailə Babazadə
İsrail ordusu və Fələstin torpaqlarını zəbt edən israillilər noyabr ayında işğal altındakı İordan çayının Qərb Sahilində 2 min 144 hücum həyata keçirib.
AzerVoice xəbər verir ki, Fələstin Azadlıq Təşkilatına (FAT) bağlı Ayrım Divarı və Yəhudi Məskunlaşma Birləşmələri ilə Mübarizə Şurası İsrailin pozuntuları və kolonial genişlənmə fəaliyyətlərinə dair noyabr ayı hesabatını yayımlayıb.
Şuranın hesabatında qeyd olunub ki, noyabr ayında Qərb Sahilində İsrail ordusu 1523, Fələstin torpaqlarını zəbt edən israillilər isə 621 hücum həyata keçirib. Bildirilib ki, bu hücumlar İsrailin Fələstin xalqına, torpaqlarına və əmlakına qarşı davam edən zorakılıq fəaliyyətlərinin davamıdır.
Hesabatda hücumların xüsusilə Ramallah, Əl-Xəlil, Beytüllahim və Nablus vilayətlərində cəmləşdiyi vurğulanıb. Ramallahda 360, Əl-Xəlildə 348, Beytüllahimdə 342, Nablusda isə 334 hücumun qeydə alındığı qeyd edilib.
Sənəddə bu hücumların birbaşa fiziki zorakılığı, ağacların kökündən çıxarılmasını, sahələrin yandırılmasını, zeytun yığanların öz tarlalarına çatmasının qarşısının alınmasını, malların müsadirəsini, evlərin və kənd təsərrüfatı obyektlərinin dağıdılmasını əhatə etdiyi bildirilib.
Hesabatda vurğulanıb ki, artan pozuntular baş verənlərin təsadüfi olmadığını, əksinə, torpaqları yerli sakinlərdən təmizləməyi və irqi əsaslı kolonial sistemi tətbiq etməyi hədəfləyən sistemli və təşkilatlanmış bir yanaşmanı təsdiqləyir. Qeyd olunub ki, Fələstin torpaqlarını zəbt edən israillilərin İsrail ordusunun dəstəyi ilə təşkil etdiyi hücumlar nəticəsində 466-sı zeytun ağacı olmaqla ümumilikdə 1986 ağac kökündən çıxarılaraq məhv edilib.
Hesabatda bildirilir ki, Fələstin torpaqlarını zəbt edən israillilər 19 yeni məskunlaşma məntəqəsi qurmağa çalışır və bunun yalnız “işğalçı” İsrail dövlətinin siyasi rəhbərliyindən gələn açıq təlimatlarla mümkün ola biləcəyi, sahədə faktiki vəziyyət yaratmaq və Fələstin coğrafiyasını daha da parçalamaq məqsədi daşıdığı qeyd olunur.
Şuranın hesabatında İsrailin “dövlət torpaqlarının sərhədlərinin dəyişdirilməsi, müsadirə və həbs qərarları” yolu ilə fələstinlilərin 2 min 800 dönüm torpağına əl qoyduğu bildirilir.
Hesabatda, həmçinin İsrailin fələstinlilərin tikinti fəaliyyətlərinə davam edən maneələri və Fələstin kənd və qəsəbələrinin təbii inkişafına qoyulan məhdudiyyətlər çərçivəsində 76 tikiliyə təsir edən 46 söküntünün sənədləşdirildiyi və digər tikililər üçün 51 söküntü bildirişi verildiyi qeyd edilib.
Digər tərəfdən, hesabatda İsrail planlaşdırma orqanlarının noyabr ayında 23 struktur planı nəzərdən keçirdiyi, onlardan 19-nun Qərb Sahilindəki məskunlaşmaları, 4-nün isə Qüdsdə İsrail bələdiyyəsinin sərhədləri daxilindəki məskunlaşmaları əhatə etdiyi bildirilib.
