BAKI, AzerVoice, Orxan Qədirzadə
ABŞ-ın İsraildəki səfiri Mayk Hakabi İsrailin Qətərin paytaxtı Doha şəhərinə hücum etmədiyini iddia edərək, baş verən insidenti “tək bir şəxsi hədəf alan raket zərbəsi” kimi xarakterizə edib.
AzerVoice xəbər verir ki, o, hadisəni ABŞ-ın Usamə bin Ladenə qarşı keçirdiyi əməliyyatla müqayisə edib və İsrailə “ikili standart” tətbiq olunmamalı olduğunu bildirib.
Səfirin sözlərinə görə, sentyabrın 9-da baş verən insident İsrailin Qətərə qarşı hücumu kimi təqdim edilsə də, əslində hədəf yalnız bir nəfər olub. Hakabi İsrailin HƏMAS-la əlaqəli olduğunu iddia etdiyi bir şəxsi hədəfə aldığını və bunun ölkəyə qarşı hücum kimi qiymətləndirilə bilməyəcəyini deyib.
Hakabi açıqlamasında bildirib ki, insident zamanı cəmi bir raketdən istifadə olunub və raket konkret bir şəxsi hədəf alıb. O, raketin yaxınlığında olan bəzi şəxslərin xəsarət alması və ya həlak olması ehtimalını istisna etməsə də, bunun Qətər dövlətinə qarşı hücum anlamına gəlmədiyini vurğulayıb.
ABŞ səfiri əlavə edib ki, bu cür əməliyyatların dövlətlərə hücum kimi dəyərləndirilməsi halında Vaşinqtonun da keçmiş əməliyyatlarına görə üzr istəməsi lazım gələr. O, Pakistan ərazisində həyata keçirilmiş Usamə bin Laden əməliyyatını nümunə göstərərək bildirib ki, həmin halda da ABŞ Pakistan dövlətinə hücum etməmişdi.
Hakabi çıxışının sonunda İsrailə qarşı fərqli yanaşma sərgiləndiyini iddia edərək vurğulayıb ki, beynəlxalq münasibətlərdə heç bir ölkəyə digərlərindən fərqli standart tətbiq olunmamalıdır.
