BAKI, AzerVoice
İran hakimiyyəti ölkənin qərbində yerləşən Luristan əyalətində genişlənməkdə olan etiraz aksiyaları zamanı İnqilab Keşikçiləri Korpusunun səfərbərlik qanadı olan “Bəsic” milis dəstəsinin bir üzvünün öldürüldüyünü açıqlayıb. Bu, təhlükəsizlik qüvvələri sıralarında qeydə alınan ilk ölüm halıdır.
Etiraz aksiyaları bazar günü ölkədə iqtisadi vəziyyətin pisləşməsinə etiraz olaraq başlayıb.
21 yaşlı “Bəsic” üzvünün ölümü İran hakimiyyətinin etirazlara qarşı daha sərt cavab mərhələsinə keçə biləcəyinə işarə edə bilər. Qeyd edək ki, paytaxt Tehranda etirazların intensivliyi azalsa da, aksiyalar digər əyalətlərə yayılıb.
“İrna” agentliyi “İnqilab Keşikçiləri”nin bir üzvünün öldüyü barədə məlumat yayıb, lakin əlavə təfərrüat təqdim etməyib. Bu barədə “Associated Press” xəbər verib.
Dövlətə məxsus “İSNA” agentliyi isə Luristan əyalətinin vitse-qubernatoru Səid Burəlinin açıqlamasını yayıb. O, hərbçinin ölümünə görə birbaşa etirazçıları məsuliyyətli sayıb.
Burəli bildirib ki, “İnqilab Keşikçiləri”nin üzvü bu şəhərdə etirazlar zamanı “ictimai asayişi qoruyarkən” “qarışıqlıq yaradan şəxslər” tərəfindən öldürülüb. Onun sözlərinə görə, “Bəsic” və polis qüvvələrinin daha 13 üzvü də müxtəlif dərəcəli xəsarətlər alıb.
İranda etiraz aksiyaları Tehrandakı ticarət bazarlarından universitetlərə və bir sıra şəhərlərə yayılıb. Bu proses bazar günü başlayan, iqtisadi böhranın dərinləşməsi, rialın rekord səviyyədə dəyər itirməsi, inflyasiyanın artması və yaşayış xərclərinin yüksəlməsi fonunda baş verən etirazların diqqətçəkən mərhələsi kimi qiymətləndirilir.
