BAKI, AzerVoice, Nailə Babazadə
HƏMAS hərəkatının rəhbərliyi yanvar ayının ilk on günlüyündə keçirilməsi planlaşdırılan Siyasi Şura rəhbəri seçkilərini təxirə salmaq barədə qərar qəbul edib.
AzerVoice xəbər verir ki, "Asharq Al-Awsat" qəzetinə danışan hərəkat daxilindəki yüksək rütbəli mənbələr səsvermənin "növbəti bildirişə qədər" təxirə salındığını bildiriblər. Yeni tarix hələ müəyyən edilməsə də, seçkilərin hər an keçirilə biləcəyi qeyd olunub.
Mənbələrdən biri təxirə salınma səbəbini regiondakı təhlükəsizlik və siyasi şərait, eləcə də hərəkatın hazırda ABŞ və regional vasitəçilərin iştirakı ilə davam edən atəşkəsin ikinci mərhələsi üzrə danışıqlara fokuslanması ilə əlaqələndirib. Bununla yanaşı, Qəzza zolağında təşkilati tənzimləmələrlə bağlı daxili fikir ayrılıqlarının da qərara təsir etdiyi vurğulanır.
Qeyd edək ki, HƏMAS-ın 1987-ci ildə yarandığı gündən bəri ən ağır böhranla üzləşdiyi bildirilir. 7 oktyabr 2023-cü ildən sonra İsrailin hərəkatın müxtəlif qanadlarına endirdiyi zərbələr ciddi təşkilati və maliyyə çətinlikləri yaradıb. İsmayıl Haniyə və Yəhya Sinvarın sui-qəsdləri nəticəsində yaranan boşluğu doldurmaq üçün yeni rəhbərin seçilməsi daxili sabitliyin bərpası və hərəkatın birliyini dünyaya nümayiş etdirmək üçün mühüm addım hesab olunur.
Hazırda Siyasi Şura rəhbərliyinə iki əsas namizədin adı çəkilir. Bunlar hərəkatın xaricdəki siyasi idarəsinin rəhbəri Xalid Məşal və Qəzzadakı Siyasi Şuranın rəhbəri Xəlil əl-Həyyadır. Mənbələr bu prosesin liderlik uğrunda bir qarşıdurma deyil, hərəkat daxilində sağlam rəqabət olduğunu bildiriblər. Üçüncü bir namizədin ortaya çıxma ehtimalı da istisna edilmir.
