BAKI, AzerVoice, Nailə Babazadə
Fələstindəki məlumatlı mənbələr Qəzza zolağını müvəqqəti idarə edəcək texnokratlar komitəsinin əksər üzvləri barədə razılığın əldə olunduğunu bildiriblər.
AzerVoice xəbər verir ki, 18 nəfərdən ibarət olacaq komitənin tərkibinə Qəzzada yaşayan iş adamları, akademiklər və vətəndaş cəmiyyəti fəalları daxildir. Təsdiqlənmiş üzvlərə çərşənbə günü Misirin paytaxtı Qahirəyə yollanmaq barədə məlumat verilib. Bildirilir ki, siyahıda Fələstin Muxtariyyətinin Nəqliyyat Nazirliyinin keçmiş katibi Əli Şaat, mühəndis Bəşir ər-Rayyes, Fələstin Tibbi Yardım Cəmiyyətinin direktoru Aed Yaği və Fələstin Universitetinin prezidenti Caber əl-Daour kimi tanınmış şəxslər yer alıb.
Mənbə qeyd edib ki, hazırda İsrailin bu adları təsdiqləyib-təsdiqləmədiyi hələlik bəlli deyil və etirazlar olarsa siyahıda dəyişikliklər edilə bilər. Misir komitənin tez bir zamanda formalaşması üçün Fələstin tərəfləri, ABŞ vasitəçiləri və İsrail ilə intensiv danışıqlar aparır. Müvəqqəti xarakter daşıyacaq bu qurumun Fələstin Prezidenti Mahmud Abbasın hökumətinə bağlı fəaliyyət göstərəcəyi bildirilir.
HƏMAS hərəkatının da komitənin tərkibi tam qətiləşdikdən sonra Qəzza zolağının idarəçiliyini onlara təhvil verməyə hazırlaşdığı vurğulanır. Bu addım Qəzzada mülki idarəetmənin bərpası və humanitar vəziyyətin tənzimlənməsi üçün mühüm mərhələ hesab olunur.
