BAKI, AzerVoice, Orxan Qədirzadə
Beynəlxalq humanitar təşkilatlar Yəməndə aclıq riskinin sürətlə artdığı barədə xəbərdarlıq edir.
AzerVoice xəbər verir ki, Beynəlxalq Xilasetmə Komitəsinin açıqlamasına görə, dünyanın ən yoxsul ölkələrindən biri olan Yəmən 2026-cı ilə son dörd ilin ən ağır ərzaq böhranına ilə daxil olub. Proqnozlara əsasən, ölkə əhalisinin yarıdan çoxu – təxminən 18 milyon insan – artan aclıq təhlükəsi ilə üzləşəcək.
Bildirilib ki, Birləşmiş Ərzaq Təhlükəsizliyi Faza Təsnifatı sistemi çərçivəsində yayımlanan son qiymətləndirmə həyat üçün təhlükəli aclıq riski altında olan insanların sayının daha 1 milyon nəfər artdığını göstərir. Eyni zamanda, Yəmənin cənubunda daxili qarşıdurmalar və regional aktorların iştirakı vəziyyəti daha da ağırlaşdırır.
Hesabatda yaxın iki ay ərzində ölkənin dörd bölgəsində 40 mindən çox insanı əhatə edə biləcək aclıq ocaqlarının yaranacağı ehtimalı qeyd olunur ki, bu da 2022-ci ildən bəri ən pessimist mənzərə hesab olunur. Uzun illər davam edən müharibə, kütləvi məcburi köçkünlük və səhiyyə xidmətlərinə çıxışın məhdudlaşması əhalinin yaşayış imkanlarını demək olar ki, tam sıradan çıxarıb.
Hazırda bu amillərə milli iqtisadiyyatın çöküşü də əlavə olunub. Ev təsərrüfatlarının alıcılıq qabiliyyəti kəskin şəkildə zəifləyib, ərzaq qiymətləri isə sürətlə yüksəlib. Bununla yanaşı, humanitar yardımın həcmi ciddi şəkildə azalıb. Məlumata görə, 2025-ci ilin sonuna qədər Yəmən üçün nəzərdə tutulan humanitar planın 25 faizdən az hissəsi maliyyələşdirilib ki, bu da son on ilin ən aşağı göstəricisidir. Qida proqramları isə tələb olunan vəsaitin 10 faizindən də azını ala bilib.
Beynəlxalq Xilasetmə Komitəsinin Yəməndəki rəhbəri Karolin Sekyeva vəziyyətin sürətlə pisləşdiyini bildirib. Onun sözlərinə görə, ailələr artıq çıxılmaz seçimlər qarşısında qalıb və bəzi valideynlər uşaqlarını qidalandırmaq üçün yabanı bitkilər toplamağa məcbur olur.
Bununla yanaşı, təşkilat böhranın qarşısının alınmasının mümkün olduğunu vurğulayaraq donorları təcili addımlar atmağa çağırıb. Bildirilib ki, nağd yardım proqramları ailələrin əsas ehtiyaclarını qarşılamaq üçün ən effektiv vasitələrdən biridir.
