BAKI,VOA
İsrail knessetinin sədri Amir Ohana İranın yeni ali rəhbəri Müctəba Xameneini sui-qəsdlə hədələyib. Müctəba Xamenei bu vəzifəyə fevralın 28-də Tehranın İsrail və ABŞ tərəfindən hücuma məruz qalması nəticəsində həlak olan atası Əli Xameneinin xələfi kimi gəlib.
Ohana "X" sosial platformasında keçmiş ali rəhbər Əli Xameneinin Həmas və Hizbullah liderləri ilə yanaşı təsvir olunduğu şəkli paylaşaraq: "Onların yolunu seçənlər, onların aqibətini yaşayacaqlar" – deyə şərh yazıb.
İsrail ordusunun xəbərdarlığı
Ohananın bu hədəsi İsrail ordusunun sözçüsünün açıqlamasından bir gün sonraya təsadüf edir. Sözçü yeni ali rəhbərin seçilməsi prosesində iştirak edən hər kəsin hədəf alınacağı barədə xəbərdarlıq edərək bildirib: "Qum şəhərində toplanmağı planlaşdıran Ekspertlər Şurasının hədəfə alınacağı barədə xəbərdarlıq edirik".
Keçən çərşənbə axşamı İsrail mənbələri ordunun İranın ali rəhbərini seçmək səlahiyyətinə malik olan Ekspertlər Şurasının iclasına "dəqiq zərbə" endirdiyini açıqlamışdı. Yüksək rütbəli İsrail rəsmisinin sözlərinə görə, bu zərbə şuranın Əli Xameneiyə xələf seçməsinə mane olmaq məqsədi daşıyırdı.
Trampın sərt mövqeyi
Bu gərginlik ABŞ Prezidenti Donald Trampın mövqeyi ilə eyni vaxtda artır. Tramp Müctəba Xameneinin vəzifəyə gəlməsinə dəfələrlə qarşı çıxdığını bəyan edib və xəbərdarlıq edib ki, yeni rəhbər onun razılığı olmadan "uzun müddət hakimiyyətdə qalmayacaq".
Tramp "Axios"a verdiyi müsahibədə bu nəticənin qəbul edilməz olduğunu vurğulayaraq
"Xameneinin oğlu zəif bir fiqurdur. Venzueladakı Delsi Rodriges hadisəsində olduğu kimi, mən də bu təyinatda iştirak etməliyəm."-deyib.
"Şirin nəriltisi" və "Epik qəzəb" əməliyyatları
28 fevral 2026-cı il şənbə günü səhər saatlarından etibarən İsrail və ABŞ İrana qarşı genişmiqyaslı hücumlara başlayıb. Tel-Əviv bu hərbi kampaniyanı "Şirin nəriltisi", Vaşinqton isə "Epik qəzəb" adlandırıb. Hücumlar nəticəsində ali rəhbər, bir çox yüksək rütbəli təhlükəsizlik və hərbi rəsmilər, həmçinin mülki şəxslər həyatını itirib. Tehran isə buna cavab olaraq "Sadiq vəd 4" əməliyyatını həyata keçirib.
ABŞ və İsrail rəsmiləri ilkin zərbələr zamanı 49 yüksək rütbəli İran liderinin öldürüldüyünü bəyan ediblər. Birgə hava hücumları Tehran, Qum, İsfahan, Kirmanşah, Kərəc və Təbriz şəhərlərində onlarla hədəfi vurub və bir çox mühüm rəhbər şəxslərin ölümü ilə nəticələnib.
