BAKI, VOA , Nailə Babazadə
Birləşmiş Ərəb Əmirliklərinin (BƏƏ) Əbu-Dabi Media Ofisi sosial media hesabı vasitəsilə Habşan təbii qaz müəssisəsi və Bab neft yatağını hədəf alan raket hücumlarının qarşısının uğurla alındığını açıqlayıb.
VOA xəbər verir ki, verilən məlumatda qeyd olunub ki, hədəfə yönələn raketlər hava hücumundan müdafiə sistemləri tərəfindən məhv edilsə də, yerə düşən qəlpə parçaları səbəbindən Habşan təbii qaz müəssisəsində işlər müvəqqəti olaraq dayandırılıb.
Hadisə nəticəsində xəsarət alanların olmadığı bildirilir. Müdafiə qüvvələri düşən qəlpələrin törətdiyi fəsadların aradan qaldırılması üçün ərazidə iş apardıqlarını qeyd ediblər.
Xatırladaq ki, fevralın 28-dən bəri ABŞ və İsrailin İrana qarşı başlatdığı hərbi kampaniyaya cavab olaraq Tehran administrasiyası bölgədəki ABŞ bazalarının yerləşdiyi ölkələri, o cümədən BƏƏ, Qətər və Bəhreyni hədəf alır. İran rəsmilərinin son məlumatına görə, ABŞ və İsrailin İrana birbaşa zərbələri nəticəsində ölənlərin sayı 1348-i keçib, 17 mindən çox insan isə yaralanıb. Ali lider Əli Xameneinin öldürülməsindən sonra bölgədəki enerji infrastrukturlarına yönələn bu hücumlar qlobal enerji təhlükəsizliyi üçün ciddi risklər yaradır.
