BAKI, VOA, Nailə Babazadə
İsrailin Müdafiə naziri İsrael Kats Livanın cənubunda həyata keçiriləcək yeni və sarsıdıcı hərbi strategiyanı elan edərək, bölgənin coğrafi və demoqrafik xəritəsini kökündən dəyişəcək rəsmi bəyanatlarla çıxış edib.
VOA xəbər verir ki, nazir vurğulayıb ki, İsrail ordusu Livanın cənubunda xüsusi bufer zona yaradacaq və Litani çayına qədər olan bütün ərazilər üzərində hərbi nəzarəti tam və daimi şəkildə saxlayacaq.
Strateji planın ən sərt hissəsi kimi Kats bəyan edib ki, İsrail ilə sərhədə yaxın ərazilərdə yerləşən Livan kəndlərindəki bütün evlər tamamilə məhv ediləcək.
Müdafiə nazirinin sözlərinə görə, hərbi əməliyyatların yekununda İsrail ordusu Litani çayına qədər uzanan təhlükəsizlik zonasında mövqe tutacaq və bu zona tam hərbi nəzarət altında qalacaq.
Nazir həmçinin qeyd edib ki, müharibə səbəbindən Livanın cənubundan təxliyə edilmiş 600 min sakin öz evlərinə qayıda bilməyəcək və bu qadağa İsrailin şimal rayonlarında yaşayan əhalinin təhlükəsizliyi qəti şəkildə təmin olunana qədər qüvvədə qalacaq.
Bu çıxış Tel-Əvivin Litani çayını yeni strateji sərhəd kimi müəyyən etdiyini və sərhədyanı bölgələri yaşayış üçün yararsız hala gətirərək daimi hərbi zonaya çevirmək niyyətində olduğunu ortaya qoyur.
