BAKI,VOA, Nailə Babazadə
Bəhreyn Silahlı Qüvvələri son 24 saat ərzində ölkə səmasına daxil olan və İrandan buraxılan 16 pilotsuz uçuş aparatının (PUA) hava hücumundan müdafiə sistemləri tərəfindən məhv edildiyini açıqlayıb.
VOA xəbər verir ki, ordunun rəsmi sosial media hesabında paylaşılan bəyanatda bildirilir ki, İranın "hücum dalğalarına" qarşı bütün müdafiə bölmələri ən yüksək hazırlıq vəziyyətindədir. Bu son əməliyyat fevralın 28-dən bəri davam edən regional gərginliyin tərkib hissəsi kimi qiymətləndirilir.
Rəsmi məlumatlara görə, müharibənin başladığı ilk gündən indiyədək Bəhreynin hava hücumundan müdafiə qüvvələri İrandan atəşlənən cəmi 188 raket və 445 PUA-nı zərərsizləşdirib. Bəhreyn ordusu strateji obyektlərin və mülki məntəqələrin təhlükəsizliyini təmin etmək üçün təyakkuzda (yüksək hazırlıq) olduğunu vurğulayır. Qeyd olunub ki, ölkənin hava məkanını hədəf alan hər bir təhdid dərhal müəyyən edilərək effektiv şəkildə sıradan çıxarılır.
Xatırladaq ki, İran tərəfi ABŞ və İsrailin fevralın 28-də başlatdığı hücumlara cavab olaraq, aralarında Bəhreynin də olduğu 7 ərəb ölkəsindəki ABŞ bazalarını və kritik infrastrukturlarını hədəf alır. "Epic Fury" əməliyyatı nəticəsində yaranan bu qarşıdurma fonunda Bəhreyn həm daxili sabitliyi qorumaq, həm də beynəlxalq koalisiya tərəfdaşları ilə koordinasiyalı hərəkət etmək üçün müdafiə sistemlərini gücləndirib. Hazırda regionda hava hücumlarının intensivliyi hər iki tərəfdən davam etməkdədir.
